Тэтгэврийн Ууган Сан /ТУС/ нь Монгол улсад хувийн тэтгэврийн сангийн үйлчилгээг нэвтрүүлэх зорилгоор 2010 онд үүсгэн байгуулагдсан. Бид гишүүн байгууллагуудынхаа хүрээнд хувийн тэтгэврийн санг амжилттай ажиллуулж аль хэдийн 8 жилийг ардаа үджээ. Энэ хугацаанд бид ирээдүйдээ зориулж цалингийнхаа багахан хэсгээр боловч хуримтлуулахын ашиг тус, хамтдаа нэг зорилгын төлөө сан бүрдүүлж ажиллахын давуу талыг харлаа.
ТУС-ийн үндсэн зорилгын дагуу тэтгэврийн насанд хүрч тухайн жилд тэтгэврийн хуримтлалаа авсан гишүүддээ хүндэтгэл үзүүлж идээний дээж дурсгалын зүйл гардуулж, тэднийхээ сэтгэлийн үгийг гишүүддээ уламжилдаг заншилтай. Энэ жилийн арга хэмжээг Голомт-Бодь ахмадын хүндэтгэлийн арга хэмжээн дээр зохион байгуулж 2018 онд ТУС-аас тэтгэврийн хуримтлалаа авсан 4 гишүүндээ хүндэтгэл үзүүллээ.
Тэтгэврийн насанд хүрээд би яах билээ, миний сар бүр авах тэтгэвэр амьдралд хүрэх үү гэдэг зовнилыг хувийн тэтгэврийн сангийн гишүүн болсноор мартаж болохыг бид хамтдаа нотолж чадсан. Энэ сайхан он жилүүдийг бидэнтэй хамт өнгөрүүлж, бидний үйл ажиллагаанд итгэл төгс байдаг нийт гишүүд болон хамт олондоо Урвуулагч хэмээх Шороон Гахай жилийн сар шинийн мэнд хүргэж, аз жаргал сайн сайхан бүхнийг хүсэн ерөөе.
