“Монголын эдийн засгийн форум” төрийн бус байгууллагаас жил бүр уламжлал болгон зохион байгуулдаг “Эдийн засгийн чуулган-2016” гуравдугаар сарын 30-31-ний өдрүүдэд Төрийн ордонд амжилттай зохион байгуулагдлаа.
Нийгмийн даатгалын шинэчлэл салбар хуралдаан зохион байгуулагдав
Хуралдааны хөтлөгч: Н.Монсор, Ю ЭМ СИ АЛФА ХХК-ийн захирал
Хуралдааны оролцогчид:
- Мөнхбаяр, Монгол банк
- Ник Козин, Би Ди Сек ХК-ийн Үйл ажиллагаа хариуцсан захирал
- Ш.Мөнхцэрэн судлаач, Эдийн засагч, Хүний хөгжил судалгаа сургалтын төв, гүйцэтгэх захирал
- Г.Баярмаа, Оюу Толгой ХХК-ийн ҮЭХ-ны дарга
- Х.Ганхуяг, Хера Холдинг ХХК-ийн ерөнхий захирал
Нийгмийн даатгалын хуримтлалын тогтолцоо, нийгмийн даатгалын өнөөгийн байдал, нийгмийн даатгалын ирээдүйд бий болох эрсдэлийн тухай мэдээлэл өгч санал солилцсон. Хуралдаанаар нийгмийн даатгалын өнөөгийн байдал болон ирээдүйд хэрэгжүүлэхээр төлөвлөж байгаа ажлуудыг дурьдсан. Өнгөрсөн 2014 оны үзүүлэлтүүдээс дурьдахад нийгмийн даатгалын сангийн орлогын 77 хувь нь шимтгэлийн орлого, үлдсэн хувь нь улсын төсвийн татаасаар санхүүжсэн байна. Эрх бүхий байгууллагаас нийгмийн даатгалын сангийн алдагдалтай ажиллаж буй шалтгааныг шимтгэлийн хувь хэмжээ бага, хүн амын насжилт, нийгмийн даатгалд хамрагдалт бага байгаа зэрэгтэй холбонгдуулан тайлбарлаж байна. Хэрэв тогтолцоо энэ хэвээр цаашид үргэлжилвэл нийгмийн даатгалын сангийн алдагдал өсөх бөгөөд одоо төлж буй шимтгэл төлөгчдийн дан ганц шимтгэлийн орлогоор ирээдүйн тэтгэврийн орлогыг бий болгох бололцоогүй байна. Иймд нийгмийн даатгалын шинэчлэлийн хүрээнд тэтгэврийн олон давхаргат тогтолцоог бий болгох шаардлагатайг дурьдсан. Энэхүү тогтолцоо нь гурван давхаргат байх бөгөөд үүнд:
- Бүх нийтийг хамарсан суурь тэтгэвэр /тэтгэврийн хэмжээг амжиргааны өртгийн өсөлттэй уялдуулан индексжүүлж байх/
- Өндөр насны тэтгэврийн албан журмын даатгал / малчид хувиараа хөдөлмөр эрхлэгчид, албан бус эдийн засагт ажиллагчдын төлөх шимтгэлд /улсын төсвөөс 50 хувийн/ татаас олгох замаар даатгуулдаг болох
- Тэтгэврийн нэмэлт хөтөлбөрүүдийг хэрэгжүүлэх
Тогтолцооны шинэчлэлийн хүрээнд тэтгэврийн нэмэлт хөтөлбөрийг хэрэгжүүлэх, хувийн тэтгэврийн даатгалыг бий болгох ажлууд яригдаж байгаа бөгөөд хувийн тэтгэврийн тогтолцооны эрх зүйн орчныг бий болгох хүрээнд СЗХ тодорхой ажлуудыг хийхээр төлөвлөж буй талаар мэдээлэл хийлээ.